Lyfjamál

Hér er að finna upplýsingar um lyfjagreiðslukerfi, þjónustu lyfjaverslana og annað sem tengist lyfjum.

Lyfjastofnun

Á heimasíðu Lyfjastofnunar má sjá að hún er sjálfstæð stofnun sem heyrir undir Velferðarráðuneytið. Helsta hlutverk hennar er að skrá lyf í samvinnu við lyfjayfirvöld á Evrópska efnahagssvæðinu (EES), hafa eftirlit með lyfjaiðnaðinum á Íslandi og tryggja faglega og hlutlausa upplýsingagjöf til heilbrigðisstarfsfólks og neytenda.
Sjá nánar um Lyfjastofnun á Vefsíðu Lyfjastofnunar

Lyfjaskírteini/endurgreiðsla

Þann 4. maí 2013 tók gildi greiðsluþátttökukerfi sem miðar að því að auka jafnræði milli einstaklinga óháð sjúkdómum. Lyfjagreiðslu einstaklings er skipt niður á 12 mánuði í senn. Upphaf þessara 12 mánaða fer eftir því hvenær einstaklingur kaupir fyrstu lyfin eftir að greiðsluþátttökukerfið tekur gildi. Það er að segja ef einstaklingur kaupir lyf 10. maí 2016 þá er tímabil hans til 9. maí 2017. Ef einstaklingur kaupir lyf í fyrsta sinn, eftir að kerfið tók gildi, 27. október 2015 þá er tímabilið til 26. október 2016.

Þau lyf sem Sjúkratryggingar Íslands (SÍ) taka þátt í að greiða eru sett inn í þrep og þegar lyfjakostnaður hefur náð ákveðnu hámarki, innan 12 mánaða tímabilsins, getur læknir sótt um að SÍ greiði lyfin að fullu það sem eftir er af tímabilinu.

Breyting á greiðsluþrepum tók gildi 1.janúar 2015. Aldraðir 67 ára og eldri, örorkulífeyrisþegar og börn og ungmenni yngri en 22 ára greiða lægri upphæðir en aðrir. Öll börn yngri en 18 ára í sömu fjölskyldu greiða sem eitt.

Á fyrsta þrepi greiðir einstaklingurinn lyfin að fullu, á öðru þrepi greiðir einstaklingurinn 15% af heildarkostnaði lyfjanna en SÍ 85% og á þriðja þrepi greiðir einstaklingur 7,5% af heildarkostnaði lyfjanna en SÍ greiða 92,5%. Það kemur til fjórða þrepsins ef heildarkostnaður lyfja fer yfir ákveðna upphæð (hjá öryrkjum, öldruðum og börnum og ungmennum yngri en 22 ára er það ef heildarkostnaður er kominn yfir 325.333 kr).  Nánari upplýsingar um greiðsluþref lyfjakaupa á vef SÍ.

Lyfjaskírteini

Ef einstaklingur notar að staðaldri lyf sem er ekki á skrá Sjúkratrygginga Íslands (SÍ) fyrir greiðsluþátttöku ætti sá hinn sami að fá lyfjaskírteini hjá lækni sínum til að lyfin telji inn í lyfjakostnað. Sé einstaklingur að nota sérlyf, sem hentar honum betur en lyf sem SÍ er með á skrá, ætti hann einnig að óska eftir lyfjaskírteini.

Upplýsingar um lyf hjá Sjúkratryggingum Íslands

Þeir sem vilja kynna sér betur lyfjagreiðslukerfið er bent á heimasíðu Sjúkratrygginga Íslands. Einnig er hægt að senda fyrirspurnir á lyfjadeild(hjá)sjukra.is.

Lyfjaverð

Lyfjagreiðslunefnd ákveður hámarksverð á lyfseðilsskyldum lyfjum og hvort sjúkratryggingar taka þátt í greiðslu lyfja.  Lyfjagreiðslunefnd gefur út lyfjaverðskrá mánaðarlega, sjá nánar hér á heimasíðu SÍ.

Þjónusta lyfjaverslana

Lyfjaverslanir landsins veita margvíslegar upplýsingar og þjónustu varðandi lyfjamál. Margar lyfjaverslanir veita afslætti sem vert er spyrjast fyrir um.
Hér eru tenglar á lyfjaverslanir sem bjóða lyfjaskömmtun og heimsendingarþjónustu á lyfjum. Athugið að mun fleiri lyfjaverslanir en þær sem hafa heimasíðu bjóða þessa þjónustu og sjálfsagt að spyrjast fyrir í lyfjaversluninni í þinni heimabyggð.

Lyfjaskömmtunarþjónusta Apótekarans

Lyfjaskömmtunarþjónusta og heimsendingarþjónusta Apóteksins

Lyfjaskömmtunarþjónusta Lyf og heilsu Heimsendingarþjónusta Lyf og heilsu

Lyfjaskömmtunar og Heimsendingarþjónusta Lyfjavals

Lyfjaskömmtunarþjónusta Lyfjavers

Lyfjaskömmtunarþjónusta Lyfju Heimsendingarþjónusta Lyfju

Lyfjaskömmtunarþjónusta og heimsendingarþjónusta Urðarapóteks

Heimsendingarþjónusta Reykjavíkur Apóteks

Lyfjainntaka

Ýmis hjálpartæki eru til fyrir lyfjainntöku og ættu að fást í flestum lyfjaverslunum, dæmi:

  • Lyfjabox með þremur aðskildum hólfum fyrir hvern dag vikunnar svo hægt er að skammta lyf fyrir inntöku þrisvar á dag
  • Lyfjadeilari sem skiptir töflum í tvennt, þrennt eða fernt
  • Mortel til að brytja töflur niður fyrir þá sem eiga erfitt með að kyngja töflum

Eitrunarmiðstöð

Á Landspítalanum er eitrunarmiðstöð sem gefur upplýsingar um eiturefni og ráðgjöf um viðbrögð og meðferð þegar eitranir verða. Símanúmer eitrunarmiðstöðvarinnar er 543 2222 (eða 112 í gegnum neyðarlínuna) og er svarað í síma allan sólarhringinn. Þegar hringt er í eitrunarmiðstöðina er gott að hafa upplýsingar um:

  • Heiti efnisins eða lyfsins, best er að hafa umbúðirnar við höndina
  • Hvenær eitrunin átti sér stað
  • Aldur, þyngd sjúklings

Á vef Landspítalans er að finna ýmsar upplýsingar um hvernig hægt er að koma í veg fyrir eitranir og upplýsingar um þjónustu eitrunarmiðstöðvarinnar.

Upplýsingar um lyf

Í gengum vefsíðu Lyfjastofnunar er hægt að fá upplýsingar um lyf og sérlyfjaskrá.

Lyfjabókin inniheldur upplýsingar um öll skráð lyf á Íslandi sem eru seld í apótekum. Hægt er að leita eftir lyfjaheiti, útliti eða innihaldsefni.

Heilbrigðisvísindabókasafn LSH er fagbókasafn á heilbrigðissviði. Safnið er öllum opið en hefur það hlutverk að þjóna fyrst og fremst heilbrigðisstarfsfólki innan Landspítala, kennurum og stúdentum í heilbrigðisvísindum við Háskóla Íslands og öðrum sem gert hafa þjónustusamning við safnið.
Á vefsíðu Heilbrigðisvísindabókasafnsins má finna tengla inn á vefsíður þar sem hægt er að finna ýmsar upplýsingar um lyf.


Athugið að efni hér fyrir ofan er fengið af vef viðkomandi stofnana/fyrirtækja

Til baka