Lögfræðiþjónusta

Hér er yfirlit yfir ókeypis lögfræðiráðgjöf, við vekjum athygli á því að einungis er um ráðgjöf að ræða.

Lagaleg aðstoð ÖBÍ

Boðið er upp á almenna ráðgjöf, þ.á.m. lögfræðiráðgjöf, á miðvikudögum milli kl. 10-13. Panta þarf tíma í síma 530 6700. Símatími er á þriðjudögum milli kl.12-13. Sjá nánar um lögfræðiráðgjöf ÖBÍ.

Orator - félag laganema við Háskóla Íslands

Orator veitir endurgjaldslausa lögfræðiaðstoð sem felst í því að almenningi gefst kostur á að hringja inn nafnlaust og bera upp spurningar um lögfræðileg álitaefni sér að kostnaðarlausu. Á vefsíðu Orators kemur fram að hjá þeim sitja fyrir svörum 2 - 3 laganemar í meistaranámi og lögmaður þeim til aðstoðar. Lögfræðiaðstoðin starfar yfir skólaárið eða frá september og fram í byrjun maímánaðar, að undanskildu próftímabili laganema í desember.

Síminn hjá Lögfræðiaðstoðinni er opinn á fimmtudagskvöldum frá kl 19:30 til 22:00 í símanúmer 551 1012.

Þess má geta að laganemar hafa ávallt verið bundnir þagnarskyldu við störf sín hjá Lögfræðiaðstoðinni.
Sjá nánar um lögfræðiaðstoð Orators og facebook síðu Lögfræðiaðstoðar Orators.

Lögfróður - Lögfræðiþjónusta Lögréttu

Laganemar við Háskólann í Reykjavík veita einstaklingum endurgjaldslausa lögfræðilega ráðgjöf.
Á vef Lögfróðs kemur fram að þau mál sem leitað er ráðgjafar varðandi geta verið á hvaða sviði sem er, t.a.m. ef óvissa er um skattamál, réttindi á atvinnumarkaði, réttindi íbúa í fjöleignarhúsi eða hjúskapar- eða erfðamálefni.

Lögfræðiþjónustan er opin alla miðvikudaga frá kl. 17:00 til 20:00. Hægt er að koma á staðinn, aðalinngang Háskólans í Reykjavík (Sólin), hringja í síma 777 8409 eða senda tölvupóst á netfangið logfrodur(hjá)ru.is. Þess má geta að lögfræðiþjónusta Lögréttu, með aðstoð KPMG, veitir einstaklingum endurgjaldslausa ráðgjöf við gerð skattframtala fyrir skattskil.

Sjá nánar um lögfræðiaðstoð Lögfróðs hér.

Lögfræðiráðgjöf við innflytjendur

Velferðarráðuneytið hefur endurnýjað samning við Mannréttindaskrifstofu Íslands um að annast lögfræðiráðgjöf við innflytjendur þeim að kostnaðarlausu. Mannréttindaskrifstofan hefur sinnt slíkri þjónustu síðastliðin tvö ár og er samningurinn endurnýjaður í ljósi góðrar reynslu af verkefninu. Óski einstaklingur eftir að hafa túlk með sér í viðtalið er það honum að kostnaðarlausu.Lögfræðiráðgjöf Mannréttindaskrifstofu Íslands við innflytjendur er veitt í húsnæði skrifstofunnar, Túngötu 14, á miðvikudögum frá kl. 14-20 og á föstudögum frá kl. 9-14. Tekið er við tímapöntunum í síma 552-2720 eða í tölvupósti: info(hja)humanrights.is

Sjá nánar um lögfræðiráðgjöf við innflytjendur hér

Lögmannavaktin - ókeypis lögfræðiráðgjöf

Lögmannavaktin er ókeypis lögfræðiráðgjöf fyrir almenning sem Lögmannafélag Íslands stendur fyrir.
Þjónustan er veitt alla þriðjudags eftirmiðdaga yfir vetrartímann eða frá september til júní ár hvert. Á vef Lögmannafélags Íslands kemur fram að panta þurfi tíma á vaktina í síma 568 5620.
Sjá nánar um lögmannavaktina.

Almenna lögþjónustan ehf - slysamál, skaðabætur og vátryggingar

Á vef Almennu lögþjónustunnar kemur fram að fyrirtækið býður ókeypis ráðgjöf, ef haft er samband í gegnum vef þeirra, ef um er að ræða slysamál,  skaðabætur og vátryggingar. Einnig skal tekið fram að ef engar bætur fást greiðist enginn lögmannskostnaður (upplýsingar af vefsíðu þeirra í júní 2016).
Senda fyrirspurn til Almennu lögþjónustunnar.

Þín Evrópa - ESB

Vegvísir fyrir borgarana er persónuleg lögfræðiráðgjöf fyrir borgara ESB, Noregs, Íslands og Liechtenstein. Hægt er að senda fyrirspurnir og fá svör um mál er m.a. varða réttindi og neytendamál.


Athugið að efni hér fyrir ofan er fengið af vef viðkomandi stofnana/fyrirtækja.

Til baka